يا مصـــــــــــــــــــــر

إدينى كمان على راسى
مش هنطق برضه يا مصر


لا هينقص من إخلاصى
و لا هطلب منك قصر


و هكمل جنب الحيط
غلبان..أهبل و عبيط


و كمان راح انام فى البيت
من قبل أدان العصر

مش هنطق برضه يا مصر

*******************

خدى منى العمر يا بلدى
مش هسأل ليه خدتيه


و هاتيلى جراح على قدى
خدى قلبى كمان و بيعيه


و اعملى من خدى مداس
موتى فيا الإحساس


أنا من دلوقتى خلاص
مخلوق قابل للكسر

مش هنطق برضه يا مصر

*******************

أسف يا حبيبتى يا غالية
عل أى كلام كان جارح


أسف أنا جرحى بينزف
و لأول مرة بصارح


ده انا إبنك مهما يكون
عاشق و لهان مجنون


و عشانك أخلى الكون
يهتفلك تحيا مصر

مش هنطق برضه يا مصر