ذو المهيــــــــــــــــــــــــــرتين: 2009

يا مصـــــــــــــــــــــر

>> السبت، 5 ديسمبر 2009

إدينى كمان على راسى
مش هنطق برضه يا مصر

لا هينقص من إخلاصى
و لا هطلب منك قصر

و هكمل جنب الحيط
غلبان..أهبل و عبيط

و كمان راح انام فى البيت
من قبل أدان العصر

مش هنطق برضه يا مصر

*******************

خدى منى العمر يا بلدى
مش هسأل ليه خدتيه

و هاتيلى جراح على قدى
خدى قلبى كمان و بيعيه

و اعملى من خدى مداس
موتى فيا الإحساس

أنا من دلوقتى خلاص
مخلوق قابل للكسر

مش هنطق برضه يا مصر

*******************

أسف يا حبيبتى يا غالية
عل أى كلام كان جارح

أسف أنا جرحى بينزف
و لأول مرة بصارح

ده انا إبنك مهما يكون
عاشق و لهان مجنون

و عشانك أخلى الكون
يهتفلك تحيا مصر

مش هنطق برضه يا مصر

مصر قوية

>> الثلاثاء، 1 ديسمبر 2009

مهما عملتوم مصر قوية
فضلها ع الأمة العربية
اقروا تاريخ لو مش عارفين
من قبل الثورة العرابية

مصر كبيرة عظيمة حكيمة
مش زى بلاد تانية لئيمة
أى مساس بالمصرى جريمة
لعنة تصيب مليون الميه
مهما عملتوم مصر قوية

مصر الأم ف وقت الأزمة
مش مهزومة دى دايماً هازمة
افهموا ياللى مالكوش لازمة
يا شعوب تلتينها الحرامية
مهما عملتوم مصر قوية

نضفناكوا و نجرناكوا
وزمان فى الثورة ساعدناكوا
ردوا قولولى مين نساكوا
دور مصر يا عالم يا غبية
مهما عملتم مصر قوية

عايشة ف شرايينى

مش ماتش كورة يخلينى

ألعن و اسبك يا بلادى

و انتى اللى عايشة ف شرايينى
جوايا عشقك مش عادى

يوم انتصارك بنغنى
يوم انكسارك نبكيكى

و لا ممكن اتحمل إنى
أشوف دموعك فى عنيكى

يا مصر قدرى انك بلدى
هفضل أنا العاشق ليكى

أنا مصرى و محدش قدى
ما تزعليش كده أرجوكى

مولاتى الأميـــــــــــــــــرة

>> الجمعة، 25 سبتمبر 2009

مولاتى الأميرة
شكراً جزيلاً لك
على رفضك أن أدخل إلى قصرك
شكراً على إعطاء الأوامر لحراسك
أن يتعقبونى
و يقتلونى
إذا ما رأونى..
فأنا و لأول مرة
أكتشف أن الحب ذنب
و عشق الأميرة
من الأمور المحرمة..
لذلك
فقد قررت
أن يتوقف قلبى
عن النبض
و يتوقف عقلى
عن التفكير..
و أن أتوقف نهائياً
عن التنفس..
عن الحب..
و عن
الحيــــــــــــــــــــــاة

التوقيع
قتيلك

محمد مختار
28/11/2004

مليكتى

مليكتى
أرجوك..أرجوك..أرجوك
لا تعتقينى
إنى أريد أن أبقى أسيرك..
سجينك..
أرجوك لا تطلقى صراحى...
أنا لم أخلق للحرية..
أنا لا أعرف غير القيد..
أنا لا أعرف معنى الشمس !!
لكن أعرف وجهك حين يطل كل صباح.
أنا لا أعرف معنى الهواء !!
لكن أعرف عطرك حين يعصف كل مساء.

أنا لن أطلب منك طعاماً..
يكفى أن يشبعنى صوتك..
أنا لن أطلب منك شراباً..
يكفى أن يروينى جمالك..

لن أتحدث عنك لقلبى..
لن أتغزل فى عينيك..
لن أتنفس بين يديك..

ما أسعدنى بين قيودى
حين يكون السجن لديك

التوقيع
أسيرك المخلص

محمد مختار
23/11/2001

يا سيدتى

يا سيدتى :
لا تجبرينى أن أستخدم ضدك
أسلحة الحب الشامل..
و الأسلحة المحرمة رومانسياً..
فأنت ضعيفة جداً أمامى..
و أنا والحمد لله..
قوى جداً..
واثق جداً..
شجاع جداً..
جرئ جداً..
فكل جيوشك أتباعى
وكل أسلحتك الفتاكة
من الطراز القديم
فاستسلمى لى بكل تواضع
و أعلنى رسمياً
تتويجى على عرش قلبك

التوقيع
عاشق لا يقهر

محمد مختار
11/11/2004

سمو الأميرة

سمو الأميرة :
أتسمحين لى بالدخول إلى قلبك ؟
أنا لا أريد إلا
شربة ماء..
نسمة عطر..
نظرة عين..
كلمة حب.
أنا لا أطمع فى المزيد..
فأنت عالية جداً..
غالية جداً..
رائعة جداً..
و أنا - و هذه مصيبتى - فقيييييييييييير جداً..
ضعيف جداً..
لا أملك من حطام الدنيا سوى
قلب صغييييييييييييييييير جداً..
أرجو أن تقبليه خادماً لمولاتى الأميرة..
ولكى منى جزيل الحب

توقيع

مواطن لا يذكر من رعايا الأميرة

محمد مختار
6/10/2001

مخرج رومانسى

لؤلؤتى..
أنت نجمة سينمائية
و أنا مخرج للأفلام الرومانسية
لكن حين نظرت إلى عينيك
عرفت أنك لا تجيدين التمثيل...
فقد اعترفت فى أول لقاء بيننا
بما كنت تخفيه عن الناس جميعاً
و أنا بكل مشاعر حب صادق
تركت من أجلك الإخراج
لنصنع سوياً حياة خالية من كل زيف
إلا
الحب

التوقيع
مخرج رومانسى

محمد مختار
15/11/2004

لعنة الحب

خايف مرة أحب و عارف ليه أنا قلبى خايف
شوفت الحب بيبكى و يضحك ملو عيون و شفايف

هكذا دائماً تكون البداية..بداية الدخول إلى عالم الحب..
العالم الذى يعرفه الإنسان جيداً..ويعرف طقوسه و عواصفه و الامه..
و لكن الفضول الذى هو من طبيعة البشر .. تدفع بى و بك للدخول إلى هذا العالم أملاً فى تغيير ما نسمعه من حكايات العذاب و الدموع
و لكن ماذا يفعل القلب عندما يلتقى بإنسان يغير طعم الحياة الرتيبة
و يكسبها الفرحة و البسمة..
و برغم الخوف نقدم على أسهل و أصعب خطوة فى الحياة و ذلك بعد النطق بكلمة العبور السرية :
" أحبك "
و يغنى القلب :
وقابلتك إنت لاقيتك بتغير كل حياتى
معرفش ازاى أنا حبيتك معرفش ازاى يا حياتى
نحن الان داخل عالم الحب..دخلنا دون أن نتحمل أدنى مشقة..
نرى الشمس رغم وجود الغيوم
نشعر بالدفء رغم اجتياح البرد
نتقن جميع لغات الحب .. نحترف الهمس .. نأخذ من القمر نوره..
يقرضنا البحر نسيمه.. نستلهم الخجل من الزهور و قد ينسى المرؤ منا إسمه ولا ينسى إسم من يحبه..
قد ينسى موعد العمل و لا ينسى موعد لقاء حبيبه..
و تترنح الأحلام فى القلوب والعقول ..
و تنساب الأمانى كما تنساب الدموع من العيون....
ثم تبدأ العاصفة
وذلك عند أول تصادمبين الحب و الواقع ...
وهذا التصادم يكون إما عند بداية الحديث عن المستقبل
أو عند الإعلان الرسمى عن الحب أمام الجميع ..
فالحب فى مجتمعنا كالمخدر يتعاطاه العشاق سراً...
و يتبدل الحال.. وترى العين رياض الزهور كأنها القبور و شمس الصيف كثلج الشتاء .. و تتحول أغانى الحب الرومنسية إلى سينفونية عذاب أبدية...
و تختلف درجة مقاومة الأحباب تبعاً لقوة الحب لديهم و تبعاً لقوة شخصياتهم..
فمنهم من يفضل التراجع ظناً منه أنه بذلك يسعد من يحب و يطبقون قاعدة :
تألم الان قليلاً فيوم ما ستسعد كثيراً....
و تبدأ الخطة الخطيرة للقضاء على الحب و هو فى مهده...
و كمقدمة تكون الرسائل على النحو التالى:
خايف أوعدك موفيش...أقولك فيه تلاقى مفيش
واخاف لو قلتى بردانة...أغطيكى بإحساسى ماتدفيش
ثم يأتى دور الضربة القاضية:
إنسانى... يا أحلى كلمة على لسانى
وبين دموع الرجاء الحارقة و كلمات الوداع القاسية يلفظ الحب أنفاسه الأخيرة... و يموت متأثراً بجراحه.
و لا يبقى منه سوى ذكرى تسعد القلب أحياناً و تقتله دائماً و يئن القلب:
افتكرتك .. لما مسكت إيدى صورتك
افتكرتك .. وافتكرت ازاى خسرتك
ثم تبقى الكلمات التى دائماً ما يعاتب بها الأحبة بعضهم البعض :
لماذا تخليت عنى.. إذا كنت تعرف أنى..أحبك أكثر منى؟؟!!
ولكنه الحب أو لعنة الحب :
فمن حقك أن تحب و من حق الحب أن يفعل بك ما يشاء....
وهناك فريق اخر يفضل الموت عن الإستسلام و يرى أن الحياة ما هى إلا حرب بين قوتين غير متكافئتين ..
حرب بين الحب الذى يبدو ضعيفاً و بين المادة التى تمتلك القوة الوهمية..
و يعتمد أنصار هذا الفريق على القاعدة التى تقول :
إذا لم تنجح فلا تفشل بسهولة.
و يبقى الأمل هو سلاحهم الأوحد و الأقوى
و يبقى الدواء الذى يخفف الام الواقع و جراح الحياة
ويظل طموحهم يصرخ :
لو صممت تكون هتكون
و مع الأيام يضل البعض الطريق
و حتى من يصل دائماً ما تؤرقه الحكمة التى تقول :
عندما نظفر بما نحلم يفاجئنا الموت..

محمد مختار
9/2/2001

الناس بتقول

>> الاثنين، 3 أغسطس 2009

الناس بتقول هندم إنى
خليتك تتقرب منى
إزاى و انا شايفك قدامى
فرحة أحلامى و أيامى
دايما بتزيد كل الامى
لو تبعد يوم واحد عنى
**************
الناس بتقول إنك قاسى
وكتير على قلبك إخلاصى
مش عارفين إنك نور عينى
و حبيبى و أحلى ما فى سنينى
مش ممكن يوم تبقى ناسينى
و أنا بيك دايما جدا مشغول
الناس بتقول
********
الناس بتقول لكن قلبى
دايب و العشق ماهوش ذنبى
حبك على طول ساكن فيا
و بحبك لو تقسى عليا
أصل انت قساوتك حنية
أما حنانك شئ مش معقول
الناس بتقول
********
خليها تقول وتقول الناس
حبيتك وانت حبيبى خلاص
مايهمش قلبك أى كلام
وياك هتحمل أى الام
لو حبك ليا يكون أوهام
خلينى ف وهمى أعيش على طول
الناس بتقول
********

عينيكى بتوجعنى

>> الأربعاء، 15 أبريل 2009

أنا عينيكى بتوجعنى
بتسمعنى صحيح لكن بتوجعنى
بتفهمنى أكيد بسى بتوجعنى
و اخاف لو مرة اصحى ف يوم ألاقيها بتخدعنى
أنا عينيكى بتوجعنى
************
عينيكى بحر بس البحر مش هادى
عينيكى سحر خدنى بعيد و مش راضى
يرجعنى لشط البحر و ينادى
أنا عينيكى بتوجعنى
************
عينيكى حدود ما بين قلبى و بين قلبك
و ياما الناس قالولى هضيع انا ف حبك
وكدبت اللى قاله الناس و صدقتك
أنا عينيكى بتوجعنى
************
عينيكى حزينة و بتضحك برغم الحزن
و بتهاجم حدود حزنى و من غير إذن
تخلينى أسلم كل أنفاسى وادوب و أحن
أنا عينيكى بتوجعنى
************
أنا هصرخ واقول لعينيكى يا عيونى
و هفتحلك مداين قلبى و جنونى
أقول يا حبيبتى قدام اللى حبونى
أنا عينيكى بتوجعنى
************

محمد مختار

نرجع تانى

>> الاثنين، 23 فبراير 2009

مش نفسك قوى نرجع تانى
بهواك و انا عارفك تهوانى
جربنا البعد و ما قدرناش
وصفولنا الصبر و ما صبرناش
من غيرك ايوه انا ضعت بلاش
وانت ما قدرتش تنسانى.
مش نفسك قوى نرجع تانى؟؟!
*******************
مش نفسك ترجع أيامنا
و نعيش من تانى ف أحلامنا
و تقولى و أقولك يا حبيبى
و انسى فى عيونك تعذيبى
مش نفسك قوى يصحى غرامنا؟؟!
*********************
أنا نفسى نسامح بعضينا
و كفاية فراق جرح فينا
و كفاية دموعك و دموعى
ليك بس خلاص كل خضوعى
قربلى و فرح ليالينا.
*************

محمد مختار

بكل اختصـــــــــــــــــــــــــــــــــار

بكل اختصار
أنا بعد منك هعيش فى انهيار
بكل اختصار
ماليش غير عيونك بلاد أو ديار
ماليش غيرك انتى وقلبك حبيبى
وبعدك حبيبتى عذابى نصيبى
و لكن بحبك وهفضل أحبك
لحد النهاية وخدت القرار
بكل اختصار
---------
يا عمرى اللى فات
يا أيام جميلة
قدرنا جمعنا
فى أيام بخيلة
بحبك
وكل البشر وقفوا ضدى
بحبك
وخايف على عنيكى بعدى
يا نور الليالى وشمس النهار
بكل اختصار
---------
يا أجمل حكاية
يا أحلى الأمانى
أنا فين هقابلك
يا روح قلبى تانى
بحبك
لأنى اتخلقت لعينيكى
بحبك
ودايب من الشوق إليكى
يا مرسى نجاتى فى بحر الدمار
بكل اختصار
---------

محمد مختار

زجل عن البحرية

>> الثلاثاء، 10 فبراير 2009

هذا الزجل كتبته أثناء معسكر التدريب فى الجيش
وبالتحديد القوات البحرية
و كانت من أسعد أيام حياتى..
إهديه إلى كل أصدقائى
من السرية التالته مركز التدريب
للقوات البحرية "أبريل 2002"

التالته هيه سريتنا
ومصر هيه حبيبتنا
و احنا جنود البحرية
بنغنى قوى من فرحتنا
*************
أول يومين اتكدرنا
ولا صف ظابط قدرنا
و زحفنا بهدومنا الملكى
من جوه كلنا عيطنا
************
شبراوى نادى على دسوقى
و سعد قال إمتى تروقى
يا دنيا إصفى عشان خطرى
واللا انتى بقى مش دنيتنا
***************
و نادى إسلام على زيزو
قال يللا باهر هنغيظه
وعلاء حكمدار التالته
حسبينه من ضمن اخواتنا
***************
هيكل سادات ندا جودزيلا
صبرى و شريف و إيهاب شلة
سته استعد يا عنتر بيه
باين على ايديك أخرتنا
**************
بين معتدل مارش يا حلوين
صفا وانتباه ثابت واقفين
هتناموا بدرى يا محترمين
لو قمنا كلنا وسكتنا
************
شيخ حسنى قال يللا يا أحباب
هنصلى ننسى أى عذاب
خليك يا بندق كده ع الباب
لا ييجى صول يخرب بيتنا
****************
الديب وقف قدام الميز
وقال ده أكل جميل ولذيذ
و زين وقف ومعاه ماكوة
و أحمد حسن من حتتنا
**************
هيثم مهند وعليوه
و العشرى واد بس حليوه
و فريد ده واد جينتل مصرى
عبدالله بيه من شلتنا
************
عبد السلام أعمال سيما
و الكوسة ما بقيتش جريمة
صلاح ده أستاذ متمكن
و أحمد سويسى ريحانتنا
***************
كيمو كان تخين جدا مليان
كان لما يمشى يسد ببان
يرحم زمان وليالى زمان
بقى ورقة طايرة فى سكتنا
****************
ابو العزايم راح قايم
و هانى فى الخدمة اهو نايم
و هيمة يوم الاتنين صايم
فى الجمعة نغسل هدمتنا
**************
كابتن صابر بص لسمعه
و قاله كل الناس جامعه
كل السرية كانت سامعه
و ف لحظة خالد كروتنا
***************
من صغره ياسر واد خفه
من يوم ما كان جوه اللفه
إمتى نشوفك فى الزفة
ونغنى على حريتنا
***********
سيد و مزمل عوده
تايسن و مختار وده حوده
و تونى و محمد يونس
وناس كتير من دفعتنا
*************
ح الصول محمد نصر يا ناس
إنسان عظيم طيب حساس
ريس محمد سعد كمان
زينة شبابنا وعترتنا
************
إحنا ضفادع بشرية
من يومنا ما لمسناش ميه
و الإسم قوات بحرية
شوفتم يا عالم مصيبتن
**************ا
إمتى هنرجع لديارنا
وحشتنا جدا سرايرنا
فات الكتير ياما صبرنا
و مسيرنا نرجع لبيوتنا..
***************

محمد مختار

اوعى

اوعى تكون هتقولها صحيح
بعدها تمشى وقلبى جريح
و تسيب قلبى يضيع فى الدنيا
و ابقى كريشة ف قلب الريح.
ّّّّّّّ******************
اوعى تكون بتفكر تبعد
طب كان ليه م الأول توعد
بص ف عينى بص يا عينى
واللا خلاص يا حبيبى ناسينى
وبقيت تعرف فى التجريح
اوعى تكون هتقولها صحيح.
*****************
لو هتكون الكلمة فراق
إهدا و فكر فى الأشواق
و انت أكيد راح ترجع تانى
قلبى اللى لا يمكن ينسانى
واللى لا يعرف فى التجريح
اوعى تكون هتقولها صحيح.
*****************

محمد مختار

قلبى معاك

ياللى قلبى معاك
وقلبك مش معايا
مستحيل انساك
بحبك للنهاية
حتى لو هتكون ناسينى
ما فى غيرك يملى عينى
انت أحلى ما ف سنينى
يا هنايا.
-----
عارف ان العند طبعك
بس راضى
مهما تجرح أو تعذب
عندى عادى
أيه هتعمل ويا دايب
قولى يا أغلى الحبايب
ليه بتبعد عن هوايا؟!
يا هنايا.
-----
انت عارف ليه بحبك
يا حبيبى؟!
اصلك انت عمرى وحياتى
ونصيبى
إيه اقولك بس تانى
يا حبيب قلبى وزمانى
هوه شوقى مش كفاية؟!
يا هنايا.
-----

محمد مختار

إرجعيله

إرجعيله
انتى أولى بحبه منى
إسمعيله
تعرفى ليه بعده عنى
انتى حبه الأولانى
قلبه مش هيحب تانى
انى كل حاجة لييه
روحه عقله نور عينيه
كان معايا وفكره فيكى
إرجعيله..مصدقانى؟!
انتى حبه الأولانى.
************
أيوه قلبى حب قلبه
بس قلبه مش معاه
كنت ببقى معاه فى قربه
بس ما عشقنيش هواه
كنتى دايما شاغلة باله
اه بعيد..بس ف خياله
إرجعيله
انتى بس اللى فى اديكى دواه.
*****************
لسه بتحبيه تعالى
عارفة إنك دايبه فيه
انتى عنده حب غالى
حتى أغلى من عينيه
أما قلبى مش مهم
مش جديد عنده الألم
المهم ترجعيله
نفسى فعلا تسعديه.
************

محمد مختار

صعب

>> الاثنين، 9 فبراير 2009

اللى يحبك
صعب يحب حبيب من بعدك
اللى يشوفك
صعب ف يوم يشتاق غير قلبك
ما انت عشان مش زى الناس
مخلوق من طيبة وإحساس
هفضل احبك عمرى بطوله
هفضل جنبك مهما يقولوا
هفضل عاشق وبإخلاص...
-------------------
عارف لو يا حبيبى ما كنتش
انت حبيبى
كنت اتمنى ابقى حبيبك
وانت حبيبى
--------
أنا مش قادر اقول غير إنى
بحب عينيك
حب مزود حيرتى وقلقى
و خوفى عليك
----------
أوعى تلمنى عشان يا حبيبى
أنا بهواك
أنا إنسان جيت هنا للدنيا
لقيتنى معاك
--------

محمد مختار

يا حبيبى

يا حبيبى
نفسى اقولك يا حبيبى من زمان
نفسى أنسى الحزن حبة
نفسى احس الكون أمان
عايز احضن بيك هنايا
عايزك انت و ده كفاية
ليك حياتى..
عمرى..
قلبى..
حبى.
و لحد النهاية.
********
يا حبيبى
كل ما انطق حرف من إسمك بدوب
اه وبحس إن قلبى
طفل مش شايل ذنوب
ياللى قلبك أحلى جنة
دموع فرحنا مكتوبالنا.
**************
يا حبيبى
قبل منك قلبى كان ضايع وحيد
لما شوفتك شوفت فرحى
جى طالل من بعيد
ياللى بعدك طال عليا
حقنا نفرح شوية.
**********
يا حبيبى
م النهاردة مش هنبعد ثانية واحدة
ع الكلام ده عمرى شاهد
ع الهوى أنا عينى شاهدة
ياللى حبك عندى غالى
شوقى ليك فوق احتمالى.
***************

محمد مختار

ضمينى يا أمى

>> الأحد، 8 فبراير 2009

ضمينى يا أمى نسينى
كل الأحزان
أنا بين أحضانك يا حبيبتى
باشعر بأمان
مخنوق م العالم والدنيا
وجيتلك أرتاح
جيتلك علشان أسمع كلمة
تقوليلى: سماح
تمسحى بكفوفك على راسى
وتقرى القران...
ضمينى يا أمى نسينى
كل الأحزان.
======
سامحينى عشان قلب حبيبك
يرتاح فى منام
وأنا هفضل دول عمرى يا أمى
دايما خدام
وأبوس الأيد اللى شالتنى
وأبوس الاقدام
سامحينى عشان يرضى يا أمى
عليا الرحمن...
ضمينى يا أمى نسينى
كل الأحزان.
======
ما نسيتش حنانك يا حبيبتى
وازاى أنساه
ده حنانك كان لما بيكبر
باكبر وياه
الله على حضنك ضمينى
الله...الله
دفينى ده انا بعيد عن حضنك
دايما بردان...
ضمينى يا أمى نسينى
كل الأحزان.
======
ادعيلى يا أمى انى ألاقى
للتقوى طريق
ادعيلى يا أمى ما اجرحش
و ما اظلمش برئ
ادعيلى أكون كلمة رقيقة
أو طوق لغريق
عارف إن انا بين دعواتك
هلقالى مكان...
ضمينى يا أمى نسينى
كل الأحزان.
======

محمد مختار

نكبر ليــــــــــــــــــــــــــه؟؟!!

نكبر ليه؟!
هوه العالم حلو ف ايه؟!
كل مكان بنلاقى حروب
والمظلوم دايما مضروب
والحق بيبكى و مغلوب
مش لاقى حد يقويه!!!
نكبر ليه؟!
***
الأطفال بتموت م الجوع
والأحلام غرقانة فى دموع
الأنانية ف قلب الناس
والحنية دى فين؟ما خلاص
وانشطبت كلمة إخلاص
وبقت ذكرى ما ليها رجوع!!!
نكبر ليه؟!
***
نفسنا كنا نعيش فى زمان
مش غرقان فى بحار أحزان
فيه الشمسة ضحكة طفل
محبوس فيه الظلم بقفل
ويكون فيه الواحد منا
أخلاقه أخلاق إنسان!!!
نكبر ليه؟؟؟!
***

محمد مختار

ما تموتيييييييييش

ما تموتيييييييييييييش
لسه ليكى ف قلبى شئ عايز يعيش
لسه شايفك دنيتى و مشوار سنينى
لسه حاسك جنتى و شوقى وحنينى
لسه ليكى ألف حلم
يعنى بعدك عنى ظلم
عمرى بعدك ما يساويش...
ما تموتيييييييييييييييييييييش.
-------------------
ما تموتيش ارجوكى قلبى ازاى هيفرح بعد منك
بعدك انتى مش هلاقى أى حاجة تاخدنى عنك
احضنى الأيام بقوة
عمرى انتى وانتى هوه
يعنى حاولى ما تضعفيش...
ما تموتيييييييييييييييييييييش.
-------------------
ما تموتيش علشان هوايا مش هسيبه لقلب تانى
انتى لسه ليكى عندى حب صادق مش أنانى
احضنى الأحلام تعيشى
حبى بكرة ما تخافيشى
غنى تانى ما تسكتيش...
ما تموتيييييييييييييييييش.
-----------------

محمد مختار

الحلوة مصـــــــــــــــــــــــــــــر

الحلوة مصر بتتمشى
على شط النيل
فى المغربية قمر طالع
والجو جميل
وقلبى كان ماشى معاها
تروح مكان يمشى وراها
إزاى أعيش تحت سماها
و أكون يا ناس فى هواها بخيل...
الحلوة مصر بتتمشى على شط النيل.
**********************
بحبها
وازاى أوصف ليكوم بكلام
الحب مش كلمة نقولها زى الأفلام
أنا حبى ليها مش عادى
أنا دمى فدى أرض بلادى
ألبى قبل اما تنادى
أديها عمرى ويبقى قليل...
الحلوة مصر بتتمشى على شط النيل.
**********************
الله على البحر الهادى
مع نسمة صيف
وشمس مصر بتتغزل
فى حبيبنا الضيف
تقوله أهلا بيك عندى
ماتنسنيش وانت معدى
أنا إسمى مصر
ومين قدى
ياما قالو فيا الناس مواويل...
الحلوة مصر بتتمشى على شط النيل.
**********************
الأهرمات بالشوق ضمة
م الناس ملايين
وقف التاريخ يشهد لينا
وليوم الدين
المصرى مصرى ومن يومه
أسد شجاع ملو هدومه
ما يغركوش أبدا نومه
ده واد جدع وبجد أصيل...
الحلوة مصر بتتمشى على شط النيل.
**********************
لو أطول يا مصر
أنا كنت اكتب فى هواكى ديوان
ما يكفينيش أوصف فيكى
ولا ألف زمان
عاشق يا حته من الجنة
قبل اما اكون طفل بسنة
ولما اموت أنا بتمنى
على أرضك انتى دمايا تسيل...
الحلوة مصر بتتمشى على شط النيل.
**********************
كل اللى خلانى يا أمى
اشعر بعذاب
حاجة سودا طلعة لنا فجأة
إسمها إرهاب
وانتى اللى قدمتى حياتك
لكل واحدة من اخواتك
حتى الغريب حس بذاتك
لما اكتشف الفمتو زويل...
الحلوة مصر بتتمشى على شط النيل.
**********************
اعذرونى
لو كلامى مش كفاية
نفسى أحكى عنها
ييجى مليوووووووووون حكاية
مصر م الرحمن هدية
شعبها ناس ميه..ميه
شوفتو ليل اسكندرية
والكرام الشرقاوية
والعريش أرض النخيل...
الحلوة مصر بتتمشى على شط النيل.
**********************

محمد مختار

الاشتراك في: الرسائل (Atom)

© ذو المهيــــــــــــــــــــــــــرتين. Friends Forever Template by Emporium Digital 2009

Back to TOP