اكدب اسرق زيف واضرب
مش هنخاف لو حتى هتغضب
دمر زور عور واقتل
بكرة ف كاس المر هتشرب
اكدب اسرق زيف واضرب
احمي الخاين وابن الكلب
وزع جايزة رصاص في القلب
واضحك ع العالم بالكدب
وابقى قابلني فين راح تهرب
بكرة ف كاس المر هتشرب
لو بصحيح عايز تحميني
ارفع راسي مش تأذيني
بالأفعال بس هترضيني
أسف أصل رصيدك شطب
بكرة ف كاس المر هتشرب
محمد مختار
شوفتوا الخيبة يا خلق يا هوه
مصري بيضرب مصري أخوه
واللي محايد فيهم ساكت
يلعن غيره بأمه وأبوه
شوفتوا الخيبة يا خلق يا هوه
اللي يخالف رأيه .. عميل
واللي يدافع عنه .. دخيل
والاتنين شربوا من النيل
واما اتكلم قاموا سحلوه
شوفتوا الخيبة يا خلق يا هوه
مش متخيل مش معقول
شهدا كتير .. فاعل مجهول
طب بالمنطق مين مسئول
واللا لصالح مين خبوه
شوفتوا الخيبة يا خلق يا هوه
يا اولاد مصر بلدنا ف أزمة
انسوا خلافنا اللي ملوش لازمة
نفسي نرجع تاني البسمة
وحقنا يرجع م اللي خدوه
شوفتوا الخيبة يا خلق يا هوه
مش فاهم مش عارف متلخبط قوي خايف
عايز ابكي ومش قادر ومفتح مش شايف
بتكلم بتلعثم وايديا بتتكتف
بتفرج بتألم على عالم بتزيف
يا بلادي يا حبيبتي أنا ليكي بتأسف
مش قادر أعملك ولا حاجة أنا أسف
مش فاهم مش عارف متلخبط قوي خايف
*********************************
أتكلم واللا اسكت واللا اصرخ ما تقولي
أنا بجد مشتت ودلوقتي فضولي
وقربت اتجنن
وفي عنيكي بدندن
بأجمل أغنية نطقتها شفايف
مش فاهم مش عارف متلخبط قوي خايف
*********************************
هدعيلك من قلبي تعدي من الفتنة
وادعيلي يا بلادي أرجعلك م الغربة
وتاخديني ف حضنك
وأحققلك أملك
يا مصر أنا ف قربك سكر وانتى قطايف
مش فاهم مش عارف متلخبط قوي خايف
احلقوا شنباتكو يا رجالة
رجولتنا خدت أمر إزالة
ضربوها وعروها قصادنا
واحنا بنتفرج ع الحالة
احلقوا شنباتكو يا رجالة
ضربوها بشومة وجت في الراس
من غير ولا رحمة ولا إحساس
زي المدبوحة ف وسط الناس
فين صوتك .. صوّتي يا عدالة
احلقوا شنباتكوا يا رجالة
عروها وعرونا معاها
ولا حدش قال أبقى فداها
وازاي راح نقدر ننساها
دي جميلة بوحريد مش محتالة
احلقوا شنباتكو يا رجالة
شاطرين ف الكورة و ف السيما
وكلامنا نميمة في نميمة
وكبيرنا أغنية عظيمة
والله وعملوها الرجالة
احلقوا شنباتكو يا رجالة
هوه ذنبى انى مصري وشلت إسمك
تعملى فيا كده وأنا ابن بطنك
بتدوسيني وتقتليني
ومن حنانك تحرميني
دانتى جوه نن عيني
قولي امتى ما شلت همك
هوه ذنبي اني مصري وشلت إسمك
طب يا ريتنى ما كنت مصري ولا انتى بلدي
ياللى عمر ما كنتى حاسة وعارفة قصدي
كل ما احلم تصدميني
آجي أنطق تكتميني
لأ وراضية تعذبيني
طب هقولك .. عذبيني تحت أمرك
أصل ذنبي إني مصري وشلت إسمك
امتى راجعة طمنيني .. طال غيابك ليه عليا
انتى قصدك تقتليني .. بالدموع اللى ف عنيا
امتى هصحى من الكابوس
واجري على ايدك وابوس
انتى بس وبالخصوص
ليكي كل حته فيا
طال غيابك ليه عليا
مصر أنا خايف عليكي خوف رهيب
زي طفل تاه من امه في يوم كئيب
هوه يصرخ وانتى تبكي
رحتى ع الأبواب بتشكي
ياما نفسي تعودي ليا
طال غيابك ليه عليا
مين شريف مين الجبان مبقتش عارف
أي شارع فيكي ضلمة .. الكل خايف
حزني عشش جوه مني
اعذري تعبيري خاني
ياللى كنتي زمان قوية
طال غيابك ليه عليا
© ذو المهيــــــــــــــــــــــــــرتين. Friends Forever Template by Emporium Digital 2009
Back to TOP
