احلقوا شنباتكو يا رجالة

احلقوا شنباتكو يا رجالة

رجولتنا خدت أمر إزالة

ضربوها وعروها قصادنا

واحنا بنتفرج ع الحالة

احلقوا شنباتكو يا رجالة

ضربوها بشومة وجت في الراس

من غير ولا رحمة ولا إحساس

زي المدبوحة ف وسط الناس

فين صوتك .. صوّتي يا عدالة

احلقوا شنباتكوا يا رجالة

عروها وعرونا معاها

ولا حدش قال أبقى فداها

وازاي راح نقدر ننساها

دي جميلة بوحريد مش محتالة

احلقوا شنباتكو يا رجالة

شاطرين ف الكورة و ف السيما

وكلامنا نميمة في نميمة

وكبيرنا أغنية عظيمة

والله وعملوها الرجالة

احلقوا شنباتكو يا رجالة

محمد مختار

Read more...

ذنبي مصري

هوه ذنبى انى مصري وشلت إسمك

تعملى فيا كده وأنا ابن بطنك

بتدوسيني وتقتليني

ومن حنانك تحرميني

دانتى جوه نن عيني

قولي امتى ما شلت همك

هوه ذنبي اني مصري وشلت إسمك

طب يا ريتنى ما كنت مصري ولا انتى بلدي

ياللى عمر ما كنتى حاسة وعارفة قصدي

كل ما احلم تصدميني

آجي أنطق تكتميني

لأ وراضية تعذبيني

طب هقولك .. عذبيني تحت أمرك

أصل ذنبي إني مصري وشلت إسمك

Read more...

امتى راجعة يا مصر؟!!!

امتى راجعة طمنيني .. طال غيابك ليه عليا

انتى قصدك تقتليني .. بالدموع اللى ف عنيا

امتى هصحى من الكابوس

واجري على ايدك وابوس

انتى بس وبالخصوص

ليكي كل حته فيا

طال غيابك ليه عليا

مصر أنا خايف عليكي خوف رهيب

زي طفل تاه من امه في يوم كئيب

هوه يصرخ وانتى تبكي

رحتى ع الأبواب بتشكي

ياما نفسي تعودي ليا

طال غيابك ليه عليا

مين شريف مين الجبان مبقتش عارف

أي شارع فيكي ضلمة .. الكل خايف

حزني عشش جوه مني

اعذري تعبيري خاني

ياللى كنتي زمان قوية

طال غيابك ليه عليا

Read more...

مصر تتحدث عن شعبها

وقف الخلق في كل العالم بصوا عليا بحزن كبير

وسط دموعى وبصوت رايح قلت يا عالم يمكن خير

دايماً بعد الشدة اليسر

بكرة يرفرف تاني النسر

انتو نسيتوا أنا مين ؟ ده أنا مصر

واسألوا عنى حتى الطير

يمكن خير .. يمكن خير

فوق النيل ياما سال الدم

والأطفال ياما شالوا الهم

والأحلام غرقت في السم

لسه وكان الوضع خطير

يمكن خير .. يمكن خير

كنت وهفضل أم الدنيا

أما ولادي كمان حاجة تانية

زى ما هدوا الظلم ف ثانية

بكرة يخلوا العالم غير

يمكن خير .. يمكن خير

أحلى وأنبل وأجمل شعب

واخدين شهرة بطيبة القلب

لا بيعرفوا ولا زيف ولا كدب

بصوا عليهم في التحرير

يمكن خير .. يمكن خير

بدعي بقلبي وقولوا آمين

يحفظ شعبي سنين وسنين

خير جنود وليوم الدين

أدعوك ربي فأنت قدير

يمكن خير .. يمكن خير

محمد مختار
19 نوفمبر 2011م

Read more...

يا مصـــــــــــــــــــــر

إدينى كمان على راسى
مش هنطق برضه يا مصر


لا هينقص من إخلاصى
و لا هطلب منك قصر


و هكمل جنب الحيط
غلبان..أهبل و عبيط


و كمان راح انام فى البيت
من قبل أدان العصر

مش هنطق برضه يا مصر

*******************

خدى منى العمر يا بلدى
مش هسأل ليه خدتيه


و هاتيلى جراح على قدى
خدى قلبى كمان و بيعيه


و اعملى من خدى مداس
موتى فيا الإحساس


أنا من دلوقتى خلاص
مخلوق قابل للكسر

مش هنطق برضه يا مصر

*******************

أسف يا حبيبتى يا غالية
عل أى كلام كان جارح


أسف أنا جرحى بينزف
و لأول مرة بصارح


ده انا إبنك مهما يكون
عاشق و لهان مجنون


و عشانك أخلى الكون
يهتفلك تحيا مصر

مش هنطق برضه يا مصر

Read more...

مصر قوية

مهما عملتوم مصر قوية
فضلها ع الأمة العربية
اقروا تاريخ لو مش عارفين
من قبل الثورة العرابية


مصر كبيرة عظيمة حكيمة
مش زى بلاد تانية لئيمة
أى مساس بالمصرى جريمة
لعنة تصيب مليون الميه
مهما عملتوم مصر قوية


مصر الأم ف وقت الأزمة
مش مهزومة دى دايماً هازمة
افهموا ياللى مالكوش لازمة
يا شعوب تلتينها الحرامية
مهما عملتوم مصر قوية

نضفناكوا و نجرناكوا
وزمان فى الثورة ساعدناكوا
ردوا قولولى مين نساكوا
دور مصر يا عالم يا غبية
مهما عملتم مصر قوية

Read more...

عايشة ف شرايينى

مش ماتش كورة يخلينى

ألعن و اسبك يا بلادى

و انتى اللى عايشة ف شرايينى
جوايا عشقك مش عادى

يوم انتصارك بنغنى
يوم انكسارك نبكيكى

و لا ممكن اتحمل إنى
أشوف دموعك فى عنيكى

يا مصر قدرى انك بلدى
هفضل أنا العاشق ليكى

أنا مصرى و محدش قدى
ما تزعليش كده أرجوكى

Read more...